Որոշ իրավիճակներում ձեր կարծիքի և արտահայտվելու ազատությունը կարող է սահմանափակվել՝ ուրիշի անձնական կյանքի գաղտնիությունը պաշտպանելու նպատակով։
Կարծիքի և արտահայտվելու ազատությունն ընդդեմ անձնական կյանքի գաղտնիության
Կարծիքի և արտահայտվելու ազատությունը երբեմն կարող է բախվել այլ անձանց՝ իրենց անձնական կյանքը հանրության ուշադրությունից հեռու պահելու իրավունքին։ Ուստի անհրաժեշտ է գտնել հավասարակշռություն՝ մի կողմից հասարակությանը հանրային հետաքրքրություն ներկայացնող հարցերի մասին տեղեկացնելու իրավունքի, և մյուս կողմից՝ անհատի անձնական կյանքի պաշտպանության իրավունքի միջև։
Վեճի դեպքում դատարանները կարող են սահմանափակումներ կամ պատասխանատվության միջոցներ կիրառել այնպիսի տեղեկությունների կամ հրապարակումների համար, որոնք առանց պատշաճ հիմքի խախտում են անձի անձնական կյանքի գաղտնիությունը։ Այս դեպքում անձի կարծիքի և արտահայտվելու ազատությունը կարող է սահմանափակվել՝ այլ անձի անձնական կյանքը պաշտպանելու համար։
Անձնական կյանքի իրավունք
Անձնական կյանքի իրավունքը ներառում է ընտանեկան կյանքը, գտնվելու վայրի գաղտնիությունը, նամակագրությունը, առողջական վիճակը և անձնական կյանքի այլ չհրապարակված կողմերը։ Անձնական կյանքի որոշ մանրամասների հրապարակումը կարող է լինել միջամտություն և խախտել մարդու անձնական կյանքի գաղտնիության իրավունքը՝ առաջացնելով բացասական կամ վնասակար հետևանքներ։
Շատ դեպքերում, երբ հրապարակումը միջամտություն է անձի անձնական կյանք, հրապարակված տեղեկությունը ճիշտ է լինում։ Սակայն նույնիսկ այդ դեպքում, երբեմն կարող է արգելվել անձնական կյանքի մասին տեղեկությունների հրապարակումը՝ անձնական կյանքի գաղտնիությունը հարգելու նպատակով։
Անձի կարգավիճակ և հանրային հետաքրքրություն
Որոշ դեպքերում կարող է լինել էական և արդարացված պատճառ՝ անձի անձնական կյանքի մանրամասները բացահայտելու համար։ Օրինակ՝ եթե դրանք վերաբերում են հասարակության համար կարևոր հարցի և նպաստում են հանրային քննարկմանը։
Ինչ կարելի է հրապարակել և երբ դա ծառայում է հանրային հետաքրքրությանը, պետք է գնահատվի յուրաքանչյուր դեպքում առանձին։ Անձի կարգավիճակը կապված է նրա անձնական կյանքի նկատմամբ հանրային հետաքրքրության աստիճանի հետ։ Հանրային գործչի դեպքում, որի գործողությունները լայն հանրային հետաքրքրություն են առաջացնում, նրա անձնական կյանք միջամտության գնահատումը կլինի պակաս խիստ, քան ոչ հայտնի մասնավոր անձի դեպքում։
Իրավաչափ սահմանափակում
Անձնական կյանքի խախտման դեպքում ցանկացած միջոց կամ պատասխանատվության միջոց, որը դատարանը կիրառում է հեղինակի կամ հրատարակչի կարծիքի և արտահայտվելու ազատությունը սահմանափակելու համար, պետք է լինի իրավաչափ։ Դա նշանակում է, որ սահմանափակող միջոցը կամ պատասխանատվության միջոցը պետք է՝
- նախատեսված լինի օրենքով,
- ծառայի ուրիշների անձնական կյանքի, ազգային անվտանգության, հասարակական կարգի, առողջության և բարոյականության պաշտպանությանը,
- լինի անհրաժեշտ և համաչափ։
Այս բաժնի մասին
Այս բաժնում կարող եք կարդալ այն կետերի մասին, որոնք կարևոր է հաշվի առնել՝ գնահատելու համար, արդյոք հրապարակումը խախտել է ուրիշի անձնական կյանքի իրավունքը։