Անձնական կյանքի իրավունքի խախտում

Եթե կարծում եք, որ ձեր անձնական կյանքի մասին տեղեկությունը առանց հիմնավոր պատճառի դարձել է հանրային, կարող եք քաղաքացիական հայց ներկայացնել այդ տեղեկությունը տարածողի դեմ։ Քաղաքացիական դատարանում կարող եք պահանջել դրամական փոխհատուցում կամ ներողություն։ Կարող եք հաշվի առնել ինչպես նյութական (օրինակ՝ եկամուտի կորուստ), այնպես էլ ոչ նյութական վնասը։ Դիմումում պետք է բացատրել․

• ձեր անձնական կյանքի որ փաստերը կամ տեղեկություններն են հրապարակվել,
• ինչպես և երբ են դրանք հրապարակվել (օրինակ՝ ամսաթիվ, ժամ, հրապարակման աղբյուր և լրատվամիջոց),
• ինչու է դա խախտում ձեր իրավունքները,
• արդյոք պահանջում եք փոխհատուցում, և ինչ տեսակի՝ դրամական կամ ներողություն,
• և հիմնավորել, թե ինչու եք պահանջում հենց այդպիսի փոխհատուցում (օրինակ՝ կոնկրետ գումարի չափը)։

Դուք կարող եք դիմել ոստիկանություն՝ անձնական կյանքի իրավունքի խախտման փաստով քրեական վարույթ նախաձեռնելու համար, եթե․

• դիտավորությամբ հրապարակվել է ձեր նամակագրությունը,
• ձեր անձնական տվյալները օգտագործվել են ապօրինի, և դա ձեզ էական վնաս է պատճառել։

Բողոքարկում

Եթե ոստիկանությունը մերժում է ձեր դիմումի հիման վրա քրեական վարույթ նախաձեռնել, և դուք կարծում եք, որ այդ որոշումն անհիմն է, կարող եք այն բողոքարկել վերադաս դատախազին։ Բողոքը պետք է ներկայացնել որոշումը ստանալու օրից 15 օրվա ընթացքում։ Որոշման պետք է նշված լինեն բողոքարկման կարգն ու ժամկետները։

Լրացուցիչ քաղաքացիական հայց

Եթե ոստիկանությունը քրեական վարույթ է նախաձեռնում, և մեղադրանք է առաջադրում մեղադրյալին, կարող եք քրեական վարույթի շրջանակում փոխհատուցում պահանջել մեղադրյալից։ Սակայն, եթե ձեր դրամական փոխհատուցման պահանջը քրեական գործով ամբողջությամբ չի բավարարվում, կարող եք ներկայացնել առանձին քաղաքացիական հայց։