Ատելության խոսք համարվելու կամ չհամարվելու միջև սահմանը շատ նուրբ է:
Ատելության խոսքն ընդդեմ վիրավորական արտահայտությունների
Չնայած վիրավորական արտահայտությունները կամ բովանդակությունը հեշտ է ճանաչել, այնուամենայնիվ, որոշելը, թե արդյոք դրանք կարելի է համարել ատելության խոսք, կարող է դժվար լինել։
Արտահայտությունները, որոնք պարզապես վիրավորական են, ինքնին չեն կարող ավտոմատ կերպով համարվել ատելության խոսք։ Կարծիքի և ազատ արտահայտվելու իրավունքը տարածվում է ոչ միայն այն հայտարարությունների կամ բովանդակության վրա, որոնք լավ են ընդունվում կամ համարվում են ոչ վիրավորական կամ չեզոք։ Այն վերաբերում է նաև այն արտահայտություններին, որոնք վիրավորում են, ցնցում կամ անհանգստություն են պատճառում։ Հետևաբար, կարևոր է տարբերել ոչ միայն ատելության խոսքը այլ վիրավորական, ոչ ընդունելի կամ ծայրահեղ տեսակետներից ու արտահայտություններից։
օրինակ Հայտարարությունը կարող է հակասել մեծամասնության կարծիքին, համարվել վիրավորական և ատելությամբ լցված, սակայն ոչ պարտադիր կերպով հարուցել ատելություն կամ բռնություն։
Սկզբունքներ
Ատելության խոսքը օրինական հանրային քննարկումից տարբերելու համար անհրաժեշտ է հաշվի առնել հետևյալ սկզբունքները․
- կոնկրետ արտահայտությունների բովանդակությունը
- այն միջավայրը, որտեղ դրանք հնչեցվել են
- այդ արտահայտությունների հեղինակի նպատակը
- լսարանի կողմից այդ արտահայտությունների ընկալումը
Ատելության խոսքի մասին հաշվետվություններ
Ռասիզմի խնդիրների մասին տեղեկացնելիս կամ հանրային բանավեճի ժամանակ մամուլն ու սոցիալական մեդիան կարող են ցույց տալ ատելության խոսքի ակնհայտ օրինակներ։ Սակայն հանրային շահ ներկայացնող հարցերի մասին հաղորդումը չպետք է շփոթել այդ արտահայտությունները խթանելու հետ։
օրինակ Լրագրողը կարող է հարցազրույց հրապարակել ռասսայական խտրականության դեմ երիտասարդական կազմակերպության հետ, որի ընթացքում կազմակերպության անդամները բացահայտ արտահայտում են իրենց ռասիստական կարգախոսները։ Լրագրողը և հրատարակիչը չեն կարող պատասխանատվության ենթարկվել այդ կարգախոսների համար, եթե հստակորեն իրենց և իրենց վերաբերմունքը տարբերակում են այդ տեսակետներից, և դրանք հրապարակվել են միայն հանրությանը տեղեկացնելու նպատակով՝ որպես ռասիզմի ընթացիկ և լայնորեն քննարկվող սոցիալական խնդրի մասին տեղեկություն։