Սահմանադրության համաձայն՝ Սահմանադրական դատարանը իրականացնում է սահմանադրական արդարադատություն՝ ապահովելով Սահմանադրության գերակայությունը։ Այն անկախ դատարան է, որը վերահսկում է օրենքների և ենթաօրենսդրական ակտերի համապատասխանությունը Սահմանադրությանը։ Դատարանի գործունեությունը կարգավորվում է Սահմանադրական դատարանի մասին Հայաստանի Հանրապետության սահմանադրական օրենքով։
Սահմանադրական դատարանը կարող է օրենքներն ու իրավական ակտերը ճանաչել անվավեր, եթե դրանք հակասում են Սահմանադրությանը: Դատարան դիմել կարելի է միայն այն դեպքում, երբ դատական ակտը վերջնական է, սպառվել են դատական պաշտպանության բոլոր միջոցները, և վիճարկվում է այն իրավական ակտի սահմանադրականությունը, որը կիրառվել է ձեր նկատմամբ և որի արդյունքում խախտվել են ձեր հիմնարար իրավունքներն ու ազատությունները։
Դիմել կարելի է նաև այն դեպքում, երբ դուք համոզված եք, որ որևէ օրենք կամ իրավական նորմ հակասում է Սահմանադրությամբ ամրագրված մարդու իրավունքներին։
Միայն Սահմանադրական դատարանն ունի օրենքը կամ իրավական ակտը անվավեր ճանաչելու իրավասություն։ Դատարանը կարող է նաև սահմանել այն օրը, որից օրենքը կորցնում է իր ուժը։ Օրինակ՝ դատարանը կարող է որոշել, որ այն օրենքը, որի դեմ բողոքել եք, ի սկզբանե անվավեր է եղել և դրա կիրառումը ձեր գործով խախտել է ձեր իրավունքները։ Կամ կարող է որոշել, որ օրենքը կդադարի գործել որոշման օրից, սակայն այն իրավաչափ է եղել ձեր գործի քննության պահին։
Սահմանադրական դատարանի որոշումներն ու վճիռները պարտադիր են բոլորի համար և չեն կարող բողոքարկվել։