Պետության կողմից ընտանեկան բռնությանը արդյունավետ արձագանքի կարևոր բաղադրիչներից մեկը բռնարարներին իրենց արարքների համար պատասխանատվության ենթարկելու մեխանիզմների կիրառումն է։ Պատասխանատվությունն առանցքային նշանակություն ունի մարդու իրավունքների իրացման գործում։ Այն մեծ դեր է խաղում նաև տուժողի վերականգնման գործընթացում և հասարակությանը հստակ ուղերձ է հղում, որ ընտանեկան բռնության ցանկացած դրսևորում պետք է պատժվի։
Իր արարքների համար քաղաքացիական պատասխանատվությունից բացի, բռնարարն ենթակա է նաև քրեական և վարչական պատասխանատվության։ Քրեական և վարչական պատասխանատվությունը ենթադրում է բռնարարի նկատմամբ պատիժ կիրառելը։ Պատժի մի շարք նպատակներ են՝ ապահովել հասարակական անվտանգությունը, վերականգնել արդարությունը, պատժել բռնարարին իր կատարած քրեական կամ վարչական իրավախախտման համար, և ապահովել, որ ինչպես բռնարարն, այնպես էլ այլ անձինք ապագայում ձեռնպահ մնան նմանատիպ իրավախախտումներ կատարելուց։
Բռնարարին պատասխանատվության ենթարկելը նաև շատ կարևոր է տուժողի վերականգնման գործընթացում, քանի որ այն նպաստում է արդարության վերականգնմանը, կարող է նվազեցնել տուժողի ինքնամեղադրանքը և նպաստել, որ նա ավելի արդյունավետ կերպով իրացնի իր իրավունքները։
Հայաստանի Հանրապետության քրեական օրենսգրքի և վարչական պատասխանատվության վերաբերյալ իրավական կարգավորումների համաձայն, ընտանեկան բռնության գործերով բռնարարները կարող են պատասխանատվության ենթարկվել տարբեր արարքների համար՝ սկսած թեթև մարմնական վնասվածք պատճառելուց մինչև սպանություն։
Բռնարարներին պատասխանատվության ենթարկելը նաև ցույց է տալիս պետության կարողությունը՝ ապահովելու մարդու իրավունքների իրացումը։ Պետության կողմից համապատասխան քրեական կամ վարչական վարույթ չիրականացնելը և բռնարարին դատապարտելու բացակայությունը կարող է հանգեցնել մարդու իրավունքների խախտման։
Այս բաժնի մասին
Այս ձեռնարկի այս բաժնում ներկայացվելու է, թե ինչպիսի քրեական պատասխանատվության կարող է ենթարկվել բռնարարն ընտանեկան բռնության արարքների համար և ինչպես կարող է տուժողը պահանջել փոխհատուցում՝ կապված քրեական պատասխանատվության հետ։